សៀមរាប៖ សួនបេះដូងនៅបរិវេណប្រាសាទអង្គរវត្ត នឹងបន្តដាក់តាំងបង្ហាញឱ្យភ្ញៀវទេសចូលទស្សនា និងថតរូបអនុស្សាវរីយ៍នៅត្រឹមថ្ងៃចុងសប្តាហ៍នេះប៉ុណ្ណោះ ពោលគឺត្រឹមថ្ងៃទី២៣ ខែមេសា ឆ្នាំ២០២៣។

ផេកហ្វេសប៊ុក Beyond The Games បានសរសេរដូច្នេះថា៖ «ឆ្លើយតបតាមការសំណូមពររបស់បងប្អូន និងមហាជន ដែលមានបំណងមកទស្សនាការដាក់តាំងបង្ហាញបេះដូងច្រើនជាងគេលើពិភពលោក ជាពិសេសបងប្អូនភ្ញៀវទេសចរនៅទីឆ្ងាយអាចចូលរួមទស្សនាបានដោយផ្ទាល់ យុទ្ធនាការ #Beyond The Games នឹងបន្តធ្វើការតាំងបង្ហាញបេះដូង នៅប្រាសាទអង្គរវត្តរហូតដល់ថ្ងៃទី២៣ ខែមេសា ឆ្នាំ២០២៣»។

សួនបេះដូងដែលមានរហូតដល់ ៣ ៩១៧ ៨០៥ ត្រូវបានរៀបចំឡើងកាលពីមុនថ្ងៃចូលឆ្នាំខ្មែរ។ សួនបេះដូងដ៏ធំនេះ ត្រូវបានកត់ត្រាចូលក្នុងបញ្ជីកំណត់ត្រាពិភពលោក Guinness World Records នាថ្ងៃទី១១ ខែមេសា ឆ្នាំ២០២៣។ សួនបេះដូងរហូតដល់ជិត ៤លានបេះដូងនេះ បានទាក់ទាញភ្ញៀវទេសចរជាតិ-អន្តរជាតិគ្រប់ទិសទីជាច្រើន៕

^{PHOTO: Beyond The Games}